മാതൃത്വവും ജോലിയും ഒരുപോലെ മുന്നോട്ടുകൊണ്ടുപോകുന്ന ഒരു യുവതിയുടെ വീഡിയോ സമൂഹമാധ്യമങ്ങളിൽ വൈറലാകുന്നു. ജോലിക്ക് ഒപ്പം കുഞ്ഞിനെ പുറത്തുകെട്ടി പെട്രോൾ പമ്പിൽ വാഹനങ്ങളിൽ ഇന്ധനം നിറയ്ക്കുന്ന യുവതിയുടെ ദൃശ്യങ്ങളാണ് ജനങ്ങളുടെ മനംകവരുന്നത്.
റോഡ് യാത്രാ വീഡിയോകൾ സ്ഥിരമായി പങ്കുവെക്കുന്ന പ്രിയങ്ക എന്ന ഇൻസ്റ്റാഗ്രാം ഉപയോക്താവാണ് ഈ ദൃശ്യങ്ങൾ പുറത്തുവിട്ടത്. പെട്രോൾ പമ്പിൽ എത്തുന്ന വാഹനങ്ങളുടെ ടാങ്കിൽ ഇന്ധനം നിറയ്ക്കുന്നതിനിടയിലും കുഞ്ഞ് സുരക്ഷിതമായി അമ്മയുടെ പുറത്തിരിക്കുന്നത് വീഡിയോയിൽ കാണാം.
കസ്റ്റമറുകളോട് സ്നേഹത്തോടെ സംസാരിച്ചുകൊണ്ട് ജോലിയിൽ വ്യാപൃതയായ അമ്മയോടൊപ്പം, ചുറ്റുവട്ടത്തെ കാഴ്ചകൾ കൗതുകത്തോടെ നോക്കിയിരിക്കുന്ന കുഞ്ഞിനെയും ദൃശ്യങ്ങളിൽ കാണാൻ സാധിക്കും. “ശുദ്ധമനസുള്ള മനുഷ്യർ” എന്ന അടിക്കു കുറിപ്പോടെയാണ് പ്രിയങ്ക ഈ വീഡിയോ പങ്കുവെച്ചിരിക്കുന്നത്.
ഈ കഠിനാധ്വാനിയായ അമ്മയുടെ ഇച്ഛാശക്തിയെ പ്രശംസിച്ച് നിരവധി പേരാണ് രംഗത്തെത്തിയത്. കുഞ്ഞിനെ ഒപ്പംകൂട്ടാൻ അനുവാദം നൽകിയ പെട്രോൾ പമ്പ് ഉടമയെയും ചിലർ അഭിനന്ദിച്ചു.
എന്നാൽ, ഇത്തരം ദൃശ്യങ്ങൾ പകർത്തി സമൂഹമാധ്യമങ്ങളിൽ ഇടുന്നവർ പ്രായോഗികമായ സഹായങ്ങൾ കൂടി നൽകാൻ തയ്യാറാകണമെന്ന് ചില ഉപയോക്താക്കൾ അഭിപ്രായപ്പെട്ടു.
ജോലിയും മാതൃത്വവും ഒരുപോലെ കൊണ്ടുപോകുന്ന ഈ അമ്മയ്ക്ക് അർഹമായ ടിപ്പോ സാമ്പത്തിക സഹായമോ നൽകാൻ വീഡിയോ പകർത്തുന്നവർ തയ്യാറാകണമെന്നും അവർ ഓർമിപ്പിച്ചു.
